A enfermidade renal crónica que xa afecta ao 15% da poboación avanza en silencio: alerta no 12M - Día Mundial do Ril
Sobre este episodio
O 12 de marzo conmemórase o Día Mundial do Ril, unha data que cumpre 20 anos poñendo o foco nun problema sanitario cada vez máis presente: a enfermidade renal crónica. Segundo explicou en Radio Voz o presidente de Alcer, Rafael Rodríguez, esta patoloxía afecta xa ao 15% da poboación española e podería converterse na quinta causa de mortalidade en 2040 se continúa a tendencia actual. En Galicia, milleiros de persoas conviven con esta enfermidade e só en 2024 máis de 2.000 pacientes iniciaron tratamento renal substitutivo, mentres outras tantas persoas recibiron un transplante. Porén, máis do 40% dos casos están sen diagnosticar, xa que o ril non adoita dar síntomas ata fases avanzadas. Durante o programa tamén participou Mariluz Pumar, elixida Muller do Ano en Narón 2026, quen leva máis de tres décadas convivindo coa enfermidade e 25 anos en hemodiálise. A súa historia converteuse nun exemplo de superación e visibiliza a importancia da prevención, os controis médicos e a doazón de órganos.