Xoán Rubia presenta o seu libro "O practicante rural" hoxe ás 19.30 horas, no Centro Cultural Torrente Ballester

Xoán Rubia foi un dos últimos practicantes rurais da Galicia desaparecida, unha figura que atendía tanto partos coma mortes, con frecuencia en soidade, nun tempo no que a sanidade rural era ben distinta á actual. No seu libro O practicante rural relata esas vivencias, que combina con emoción e reflexión, como a atención a unha moza que deu a luz sen saber que estaba embarazada ou o acompañamento á morte de xente nova, especialmente mozos afectados pola droga e o VIH. Rubia tamén rememora a súa afección pola música, ao punto de cantar con pacientes nas súas últimas horas, e a súa relación cos animais, desde os traballos con veterinarios ata a súa relación cos seus propios animais, como o gato Michi, co que escribiu durante o confinamento. A pesar de que recoñece os avances na sanidade e a mellora das condicións de vida no rural, tamén alerta dun futuro incerto e das consecuencias das decisións políticas globais.