Conmemoración do Día Mundial do Ril: Unha chamada á Conciencia sobre a Enfermidade Renal Crónica (ERC)

Hoxe, con motivo do Día Mundial do Ril, celebramos unha xornada informativa acompañados polo presidente da Federación Alcer Galicia, Rafael Rodríguez, quen estivo acompañado por outros membros da asociación. Este día ten como obxectivo sensibilizar á poboación sobre a importancia de coidar a saúde renal e facer un chamado á acción para previr e detectar a tempo as enfermidades renais, que afectan xa ao 15% da poboación española. A Enfermidade Renal Crónica (ERC) é unha patoloxía en constante aumento. Na última década, incrementouse máis dun 30% en España e, se continúa neste ritmo, estímase que para o 2040 a ERC será a quinta causa de morte no país, afectando a un terzo das persoas maiores de 65 anos. Actualmente, máis de 67.000 persoas en España están en tratamento de diálise ou transplante renal, e cada ano ingresan arredor de 7.000 novos pacientes nestes programas, sendo a diabetes un dos principais factores causantes, representando un 25% dos casos. En Galicia, hai actualmente 2.025 pacientes en diálise e 2.062 con transplante renal en funcionamento. Este ano, o Día Mundial do Riñón celébrase baixo o lema “Están ben os teus riles? Descúbreo a tempo, protexe a túa saúde renal”. Con esta campaña, búscase concienciar sobre a prevención, a detección precoz e o infradiagnóstico da ERC, que afecta a un 40% da poboación sen ser diagnosticada. Rafael Rodríguez, presidente de Alcer Galicia, destacou a necesidade urxente de campañas de sensibilización e detección precoz para frear o avance desta enfermidade, que se está estendendo a un ritmo alarmante.