Abraham Cupeiro presenta "Loira" este domingo no Auditorio de Ferrol: emoción, tradición e sons do mundo

Este domingo, o Auditorio de Ferrol acollerá un dos concertos máis esperados da tempada. A partir das sete da tarde, Abraham Cupeiro presenta Loira, o seu último espectáculo e traballo discográfico, nunha nova parada da súa xira por Galicia. O multi-instrumentista sarrián, coñecido pola recuperación de instrumentos antigos e a súa capacidade para conectar tradicións musicais de todo o mundo, volve a Ferrol tras o éxito de Mithos o ano pasado. Nesta ocasión, Cupeiro ofrece un espectáculo máis íntimo, emocional e mestizo, acompañado de músicos excepcionais e voces como as de Davide Salvado e Matthew Ward. Loira é un canto á diversidade, á natureza, á memoria e ao afecto. Un disco que leva o nome da súa cadela, rescatada da rúa hai dez anos, e que simboliza a mestura de sons e sentimentos que percorren todo o repertorio. Desde a música tradicional galega ata ecos de Irlanda, Europa do Leste ou Arxentina, o espectáculo convida a unha viaxe sensorial que combina lirismo, ironía e unha posta en escena visualmente coidada. Abraham Cupeiro conversou esta mañá con nós e deixou claro que, para el, a música é unha ferramenta para contar historias humanas, pequenas, pero moi profundas. E con ese espírito chegará este domingo a Ferrol. A cita é ás sete da tarde. Loira promete emocionar, sorprender e, sobre todo, facernos viaxar a través do tempo e das emocións.