Narón reparte paraugas co lema «Merca en Narón. Facemos cidade» para impulsar o comercio local nas rebaixas

O Concello de Narón entregou esta semana novo material promocional co obxectivo de apoiar e dinamizar o comercio local de proximidade coincidindo coa tempada de rebaixas. A concelleira de Promoción Económica, Olga Ameneiro, fixo entrega de paraugas co lema «Merca en Narón. Facemos cidade» á presidenta da Asociación de Comerciantes de Narón, Choly Díaz, e á secretaria da entidade, Laura Rodríguez. Esta iniciativa pretende poñer en valor a importancia do comercio de rúa, destacando a súa cercanía, a atención personalizada e o papel fundamental que xoga na vida diaria e na economía local. Os paraugas repartiranse entre os establecementos asociados para que poidan regalalos á súa clientela durante o período de rebaixas, como incentivo ás compras e ferramenta de fidelización. Desde o Concello de Narón salientan que este tipo de accións forman parte dunha estratexia continuada de apoio ao comercio local, considerado un sector clave tanto para o tecido económico como para a dinamización social e urbana do municipio. O goberno local reafirma así o seu compromiso coa promoción do consumo responsable e de proximidade, contribuíndo a facer cidade a través do comercio.