O Rueiro de Ares celebra o Magosto-Samaín con calacús, música tradicional e unha queimada popular

O Rueiro de Ares celebrará o vindeiro sábado, 31 de outubro, unha nova edición do Magosto-Samaín, unha xornada festiva que combinará tradición, gastronomía e actividades populares. A cita comezará ás cinco da tarde e incluirá un obradoiro de colares de zonchos, dirixido aos socios, así como mesas e utensilios para que os asistentes poidan preparar os seus propios calacús. A organización convida toda a veciñanza a participar nesta celebración aberta ao público. A programación completarase cunha foliada na praza da Casa da Santa Compaña e o conxuro da queimada, nunha tarde pensada para gozar do ambiente do Samaín e manter vivas as tradicións galegas. A iniciativa conta coa colaboración do Concello de Ares.