O Teleclube 04x01: "La Bola Negra"

'O Teleclube' arranca a cuarta temporada coa forza imparable de 'A bola negra' Os Javis estrean a súa segunda longametraxe, á que todo o mundo está a chamar a película do ano. Javier Ambrossi e Javier Calvo dirixen este filme épico, unha obra bélica e queer ambientada en tres épocas: 1931, 1937 e 2017. Nas tres historias coñecemos as vidas de tres homes gais, Carlos (Milo Quifes), Sebastián (Guitarricadelafuente) e Alberto (Carlos González), e como conviven o momento histórico que lles toca vivir e a súa sexualidade. Inspirada nunha obra inacabada de Lorca, da que toma o título, e na obra de teatro 'A pedra escura' (escrita polo seu coguionista Alberto Conejero), 'A bola negra' fala da importancia de saber o que pasou no pasado, do impacto que ten no noso presente e do medo a que poida volver pasar no futuro. Estamos moi emocionadas por entrar nas conversas que está a xerar 'A bola negra', a cal se está convertendo nun verdadeiro acontecemento do cine español. E lembra que, se queres estar ao tanto das novidades, podes seguirnos na nosa conta de Instagram, @oteleclube . E non dubides en escoitar os episodios anteriores en Spotify, iVoox e na web d'O Salto Galiza.